Mile high club

Þegar fólk stundar kynlíf í háloftunum kemst það sjálfkrafa í MileHigh Club. Þetta fólk er oftar en ekki drukkið og fyrir ykkur sem hafið reynt þetta þarf ekkert að tíunda hve erfiðlega gengur að athafna sig á flugvélaklósetti. Því er ekki nema von að maðurinn hafi þurft að opna hurðina, það hefur einfaldlega hentað látunum þetta sinnið. Það eru óskráðar reglur að áhafnir flugvéla láti þessa iðju fram fara án nokkurs inngrips enda nokkur virðing borin fyrir þessum klúbbi. Að minnsta kosti hafa áhafnir IcelandAir gefið þessu slakan taum, eina tilfellið sem ég veit til þess í raun að flugþjónar hafi skipt sér af var með EasyJet-flugfélaginu. Til frekari upplýsinga um þennan klúbb má lesa hér: http://www.milehighclub.com/ og Mile high club - Wikipedia, the free encyclopedia. Þess má geta að í klúbbnum eru hérlendis þrír starfandi ráðherrar, fjöldi athafnamanna, þekktur knattspyrnuþjálfari,  flugmenn og flugþjónar auk fjölda annarra.

Reyndi að opna flugvélahurð í lofti

Skammtar bara minni

Menn hafa jafnt og þétt minnkað skammtinn af fiski á veitingahúsum í Reykjavík til að mæta hækkandi verði (auk þess að hækka verðið) þannig að ég skil ekki hvað menn eru að kvarta. Allir nema Múlakaffi bjóða barnaskammt af fiski fyrir yfir 2500 kall og ættu að skammast sín. Svo sárna mér þessar gulrætur sem alltaf fylgja fiskréttum núorðið, ég horfi bara á fiskinn minn og verð einhvern veginn dapur þegar þessu er laumað með, kannski undir fiskinum til að láta hann virðast meiri. Þetta verðskuldar rækilega úttekt.

Verð á íslenskum þorski rýkur upp

Þetta er nú ekkert..

Ég horfði á þáttastjórnandann Jay Leno ítrekað kalla vin sinn Kevin gítarleikara negra (e. nigger) í þáttum sínum nú í vikunni án þess að blikna og það sem verra var að börnin mín voru við skjáinn og spurðu mig í sakleysi sínu: Af hverju er þessi brúni svona leiður? Af hverju er þessi að stríða honum? Það er sorglegt að íslenskum áhorfendum skuli boðið upp á svona niðurlægingu og vil ég fyrir hönd Skjás eins biðja blökkumannaleiðtogann Obama afsökunar á þessu.

Jackson notaði N-orðið

Rétti andinn

Það er jákvætt að fólk undirbúi aðgerðir og nú væri gaman að sjá fleiri láta hendur standa fram úr ermum. Ég veit að tjaldbúar (og fellihýsa) ætla að undirbúa aðgerðir í kvöld í Atlavík og eitthvað heyrði ég úr Hrafnagili líka. Tjaldsvæði landsins eru vettvangur hvers kyns aðgerða af öllu tagi og skora ég á fólk sem er á leið út úr bænum um helgina að undirbúa sig vel. Hvernig er með tjaldsvæðið í Ásbyrgi? Og Skaftafell? Nú tökum við höndum saman!

Tjaldbúar undirbúa aðgerðir

Vonum að þetta fari vel fram

Það er leitt að segja frá því en það hefur lengi loðað við svona tónleika að ungt fólk dópi frá sér ráð og rænu og þessi Freeland virðist ekki þess legur að vera nein undantekning. Við skulum hugsa vel til Adams og þeirra fjölmörgu dansara sem hylla hann á laugardag. Það væri óskandi ef alsælan yrði skilin eftir heima í þetta sinn og sölumenn dauðans sælist ekki eftir sneið af kökunni. Þá gæti Hugsandi Danstónlist staðið undir nafni.

Er með rokk í hjartanu

Benedikt við kabyssuna stóð - í kröppum dansi

Alltaf er gaman að lesa fregnir af atvikum þar sem íslenski lopinn kemur að góðum notum. Það er uppsveifla í sölu lopaafurða um þessar mundir en fókusinn er alltof sjaldan settur á eiginleika ullarinnar. Hugsa sér að það eru ekki nema um 10 ár síðan þetta var nánast verðlaus afurð en ég held að allir eigi sér sögu af því þegar íslenska ullin kom til bjargar á ögurstund. Það má svo sannarlega segja að það komi hér fram í harmsögu Benedikt Ásgeirssonar, fjölskyldu hans og útliegubúnaðarins.

Rauk upp á þak til að slökkva eldinn

Nú er nóg komið!

Ég hef verið dugleg að ferðast með fjölskyldunni um landið í sumar og verið einstaklega ólánleg með veðrið. Þótt víðast hvar hafi verið sólríkt í sumar hefur alltaf verið hálfgerður kalsi í kringum okkur, hvort heldur það var í sumarhúsinu í Skorradal eða á tjaldstæðum á Vesturlandi. Ýmis var þá svalt og hálfgerður strekkingur eða það naut engrar sólar. Nú vil ég fara að fá mitt, fá minn hluta af þessu sumri sem senn er á enda og jafnvel ná mér í smá lit. Ef menn geta ekki séð til þess að fólk geti byggt á spám Veðurstofu Íslands og hagað sínum áætlunum eftir þeim má allt eins leggja þessa stofnun niður. Það hefur ekkert gengið upp í sumar, ekkert, og það er bara ekkert hægt að lesa í veðrið eftir þeim upplýsingum sem birtast á vedur.is. Getur verið að stærri aðilar í ferðaþjónustunni hafi þarna áhrif?

Veður fer kólnandi

Líka bannað í Breiðholtinu

Það er gaman að sjá hve við Íslendingar erum framarlega þegar kemur að ásýnd borgar og virðingu við mannvirki. Ég vil nefna tvennt. Í fyrsta lagi hefur verið bannað að sofa á götunni í Breiðholtinu síðan 1988, þá lögðum við Gummi og Haffi okkur á göngustíg rétt við sundlaugina en höfðum ekki sofið lengi þegar við vorum hirtir upp og teknir upp á Fellastöð. Hitt er það að árið 2000 var ég handtekinn fyrir að hafa klifrað upp á eina af styttum bæjarins til að njóta sólar og fá mér hressingu. Mér þótti nóg um á sínum tíma en nú fyllist ég stolti þegar ég les um að stórborgir Evrópu líti til okkar Íslendinga og læri af siðum okkar.

Bannað að sofa á götunni

Hvernig væri að huga að íslenskum skólum?

Icelandic Business Forum ættu kannski að beina sjónum að Vogaskóla t.d., þar sem skólalóðin er til skammar og foreldrar eru orðnir langeygir eftir aðgerðum. Borgarstjóri kom við þar í vor og fyrirheitin voru falleg en síðan hefur lítið gerst og nú líður að skólabyrjun aftur og á þetta að ganga svona lengi? Ég held að Kínverjar séu nógu margir til að sjá um sína skóla sjálfir. Mér er ofboðið.

Íslendingar reisa skóla á skjálftasvæðinu í Kína

Það er nú ekkert!

Einu sinni var jarðskjálfti upp á 6,3 á Richter í Hveragerði. Þá var sko hasar, tjón og meiðsli. Þetta var ekkert miðað við það, varla að maður yrði var við þetta. Smákippur. Rétt svo að páfagaukurinn varð órólegur.

Jarðskjálfti á Suðurlandi