Og eru þá ótaldir þeir sem unnu á eigin vegum

Þetta styður mál hæstvirts dómsmálaráðherra, ég veit um nokkra sem sinna löggæslu á eigin vegum á höfuðborgarsvæðinu nótt sem nýtan dag. Ekki þarf nema vökult auga eða hjálpandi hönd sem leggur lögreglunni lið með einum eða öðrum hætti; segjum símtal, aðgátsorð og leiðbeinandi atlot sem geta skipt sköpum á örlagastundu.

44 sinntu löggæslu á laugardagsnótt

Óviðeigandi fyrirsögn til skammar

Hér í meðfylgjandi frétt má sjá hvernig fréttamenn vega gróflega að fyrirsætum vítt og breitt. Að fullyrða að ein starfsgrein sé heilaskemmandi elur á fordómum og nægir kunna þeir að vera fyrir. Hvernig þætti mönnum ef fyrirsagnir á borð við: Sjómannsstarfið heilaskemmandi, eða Heilaskemmdir í slökkviliðinu birtust í virtum fjölmiðlum. Þetta er í einu orði sagt til skammar!

Fyrirsætustarfið heilaskemmandi

Upplestur á blogginu mínu

Þar til forsvarsmenn mbl-bloggsins gefa kost á upplestri á bloggsíðum mbl líkt og boðið er upp á í fréttum hef ég ákveðið að gera lesendum kleift að hlusta á mínar færslur og með minni röddu. Skammt er í að fyrstu drög að þessari nýbreytni verði tilbúin en mér finnst sjálfsagt að mismuna landsmönnum ekki þannig að lesblindir geti ekki notið bloggsins. Ég skora á aðstandendur mbl.is að koma þessu í gagnið hið snarasta.

Verst fyrir drengina

Það er vitað mál að drengir þurfa á móður sinni að halda og Britney á kost á því að veita þeim allt sem hugurinn girnist. Það þarf ekkert að ræða það hve illa hefur verið farið með hana í þessu máli öllu og fjölmiðlar hafa ekki síst litað hana dökkum litum. Federline hefur ekkert með þessa drengi að gera enda orðinn gamall, farið að slá í hann eins og sagt er eins og sjá má á meðfylgjandi mynd. Það er grátlegt til þess að vita að þetta bíði drengjanna frekar en fallegt heimili Britney sem allt vill gera fyrir drengina eins og fram hefur komið í nokkrum tónlistartímaritum og á vefsíðum. Nú finnst mér að aðdáendaklúbburinn hér heima mætti láta í sér heyra.

Britney afsalar sér forræði

Hlær, því hann veit ekki verðið á Lýsi

Bölvuð endimis vitleysa er þetta. Lýsið er hálfu dýrara en dísillinn og þar að auki ætlað til manneldis en ekki í fíflagang. Allt gera menn nú til að komast í blöðin. Tel ég víst að við sjáum Óðin næst í Kastljósinu fyrir þetta tiltæki. Hann hlær þó ekki þegar hann kemst að raunkostnaði Lýsisins. Honum væri nær að gefa þetta í Barnahjálpina, milli 5- og 600 börn í Reykjavík meira að segja búa við skort og fá eflaust ekkert lýsi nokkurn tímann. Þá er gott að við eigum svona karla sem sóa því hlæjandi.

Drýgir dísilolíuna með hákarlalýsi

Þarf þetta ekkert að vinna?

Ósköp eru að sjá þessa pjakka spila golf daginn út og inn. Og nú líða börnin fyrir að sýna verður þetta pot í sjónvarpinu, í beinni útsendingu frá morgni til kvölds. Barnatímanum er kippt út fyrir þetta helvíti. Annað væri nú ef þetta væri fótbolti en ekki þetta sem öllum er sama um. Þessa 12 tíma dagskrá sjónvarps má draga saman í hálftímaþátt með Valtý Birni, Pot og Vei!, kannski í lok dagskrár. Hvað á ég nú að horfa á? Og að sjá þessa menn sem virðast ekkert hafa við tímann að gera annað en að sýnast þetta. Og hvað með fólkið sem fjölmennir og horfir á. "Best að taka sér stöðu hér, kannski sé ég boltann fara langleiðina héðan." Grátlegt. Ekki skapar þetta lið gjaldeyri á meðan. Þetta er engum til gagns. Og að þetta sé fullorðið fólk. Nú skulu apakettirnir á kaffistofunni fá að heyra það næst þegar einhver opnar á sér munninn til að ræða forgjöf.

Greg Norman heldur sínu striki

Söguslóðir Bubba mun merkilegri

Ég held að ferðin "Söguslóðir Bjarkar" um Ísland sé fyrirfram tapað spil. Jú það má skoða staðina þar sem Tappinn spilaði og húsin henar í Reykjavík en hvað með alvöru ferð - þ.e. söguslóðir Bubba? Þar erum við að tala um hringinn allan og svo mætti taka Rúnna Júl með í þetta og fara til Frakklands og Kúbu. Hljómsveitin Gildran væri á sömu slóðum og Sigur Rós fyrir utan Ásbyrgi en nær væri að skoða Magna eða Land og syni og enda á Þjóðhátíð. Svo sé ég ekki af hverju ekki mætti skoða söguslóðir Múm fyrst verið er að hampa krúttkynslóðinni. Þetta er landi og þjóð til skammar.

Á söguslóðir Bjarkar

Ætti heldur að skammast sín

Svona ólíkindatól ætti ekki að yppa sig svona, hann ætti heldur að skammast sín og hugsa um hvernig hann hefur komið fram við konur gegnum tíðina. Ég sé ekki betur en hann hylji sjálfur skallann með blæju og svo er hann eins og kjáni í þessari múnderingu. Hann ætti að sjá sóma sinn í að tala ekki við nokkra konu eins og hann hefur komið fram við þær í gegnum tíðina. Ég ætla ekki einu sinni að ræða nafnið sem hann fer svo fjálglega með að skömm er að. Megi Yusuf aldrei þrífast!

Cat Stevens fær skaðabætur

Það má þó skreppa í Lax

Það er makalaust að Gæslan beri sín mál á torg aðeins nokkrum dögum eftir að sama stofnun hefur notað vélakostinn til að fara með flottræfla í Lax inn í Þórsmörk. Þá var ekki verið að hafa áhyggjur af slysum á sjó eða landi. Þá mátti bara kveikja í vindli og fá sér í glas og skemmta sér. Hvar var Jakob Ólafsson þá? Og hver borgaði brúsann? Vorum það við skattborgarar? Mér er spurn!

„Farið að hrikta í“

Hvað gæti Madonna gert krassandi?

Þetta verður ljóta floppið. Það er ljótt að auglýsa sjálfa sig og nota til þess eymd og volæði þessara ræfla. Við skulum bara vona að hún fari ekki í sleik við Britney, það var það sem hratt af stað óláni Britney og síðan hefur allt legið niður á við. Og svo á að blanda þessum sómapilti í þetta. Hann fær kannski loksins að sofa hjá Britney, hann dreymir það örugglega enn og svíður sárt að hafa ekki komist alla leið með henni á sínum tíma. Það væri þó óskandi að hann fengi eitthvað að sofa hjá svo hann verði einhvern tímann að manni.

Hittast aftur á sviðinu