Óþverri er þetta!

Ég tek stórt upp í mig í dag þar sem ég hef smakkað svona birkiís í Danmörku og annan eins óþverra hef ég ekki vitað. Mér bókstaflega sárnaði þar sem ég hafði keypt handa systur minni og börnum hennar líka. Og þetta á að bjóða upp á hér á landi. Þetta gæti sem snöggvast gert ferðaþjónustunni meiri skaða en hrefnuveiðar og Saving Iceland til samans. Og svo verður auðvitað að hafa áfengi um hönd. Er ekki nóg af því fyrir, mér er spurn?!

Heilnæm sætindi

Kóala"björn"?? Gæt að

Nú veit ég ekki hvað hefðin er rík í svona skrifum en ég hélt að það væri kennt í grunnskóla að kóala"björninn" er í raun ekki af tegund eða ætt bjarna og á því ekki að kallast björn með réttu. Þetta skemmtilega fyrirbæri er af ættkvísl pokadýra og því í raun skyldara kengúrunni Skippy en nokkrum birni. Skyldi þessi kútur hafa verið svo heppinn þegar allt kemur til alls? Líklegra þykir mér að honum hafi blöskrað gáleysi bílstjórans og einsett sér að hefna með öllum mögulegum leiðum. Þetta er því hálf-óhugnaleg frétt. Sögu þessara tveggja grunar mig að sé ekki með öllu lokið. Þessi kóali mun ekki hætta fyrr en í fulla hnefana.

Heppinn kóalabjörn

Rangt með farið

Þetta er bara ekki rétt. Brasilíumaðurinn knái Ronaldinho er á leið til Manchester City og hefur æfingar þar í byrjun næsta mánaðar skv. fréttastofu Reuters og mun að líkum spila með þeim frá upphafi leiktíðar. Spurningin er hins vegar sú hvort vinur hans og fyrrum liðsfélagi Eiður "Smári" Guðjohnsen muni spila þar með honum? Gaman verður að fylgjast með þessu. 

Ronaldinho til AC Milan

Huggy Ragnarsson?

Skyldi þetta ekki hafa verið frk. Huggy Ragnarsson á vappi? Eðlur eru ekki hluti af náttúru Íslands. Huggy hins vegar er eitthvað undarleg til munnsins. Hvar var Árni Sigfússon þegar þetta gerðist? Hver svarar fyrir þetta? Ættum við ekki að sýna óskabörnum landsins virðingu fremur en að gera svona ómaklegt grín? Mér sárnar þetta.

Eðla á ferð í Keflavík

Of drukkinn til að keyra

Það er kúnst að aka undir áhrifum áfengis. Ég hef sjaldan þurft að blása í mæli sem betur fer en það hefur komið fyrir að ég hef reynst allsendis ófær um að keyra sökum ofdrykkju. Þá höfum við sem betur fer haft klink meðferðis til að taka strætó og einu sinni fórum við á puttanum fjölskyldan vestur á Seltjarnarnes.

Of drukkinn til að blása í mæli

Margir veikir á Akranesi líka

Ég átti leið um Akranes á írskum dögum þar í bæ fyrir skemmstu. Nú er ég alveg laus við fordóma og slíkt en mér varð bylt við er ég sá hvað Skagamenn eru illa staddir þegar kemur að aðbúnaði drykkjumanna og öryrkja. Þarna gengu menn (og konur) um götur í þannig ástandi að ég hætti mér ekki út úr bílnum og ég heyrði frá Ólöfu frænku minni sem hefur búið þarna í 11 ár að það sé jafnvel enn verra ástandið inni á mörgum heimilum sem hún veit um. Margir eru alls ófærir um að sjá um sig sjálfir og þetta bitnar náttúrulega mest á börnunum. Ég er alls ekki að tala illa um írska daga, mér sýndist þetta allt vera gert af góðum hug og eflaust margt til að skemmta sér við í bænum en ég lét duga þennan litla rúnt um bæinn og innlit hjá frænku. Þakka fyrir það Ólöf mín.

Veikasta fólkið í borginni

Voru börnin um borð

Þetta mál gæti reynst alvarlegra en virðist í fljótu bragði. Margs er að gæta þegar sumarhúsi er stolið. Eitt af því er að gá til manna og dýra um borð. Gaman er að minnast þess þegar Sighvatur Óli nágranni minn tapaði sínu fellihýsi árið 2002. Þá orti hann þetta:
Fellihýsið farið er,
fokk hvað þetta beit.
Kata litla og Kristófer,
komin upp í sveit.

Sjaldgæfur stuldur: Sumarhús á hjólum horfið

Ekki Sigur Rós heldur Guns 'n Roses

Lagið Sæglópur verður notað í Prince of Percia en flytjendur eru sem vitað er og ljóst af fréttum hér að framan Guns 'n Roses. Sigur Rós hefur hins vegar flutt efni sem notað var í DVD-útgáfu myndarinnar Heima. Mildi er að ekki fór verr með þennan litla misskilning.

Lag Sigur Rósar í tölvuleik

Reginfirra

Hvað ætla menn sér nú með þessu? Hafa ekki nógu mörg mannslíf tapast við þessa stíflu? Geta menn ekki bara skoðað einhverja aðra stíflu? Til dæmis Sigöldu?

Umferð hleypt á Kárahnjúkastíflu

Slash víst í hljómsveitinni

Það er leitun að annarri eins sorpfréttamennsku og þeirri sem hér birtist.
1) Slash er í Guns, það vita allir og hann var bara í pásu.
2) Bucket-head er látinn, því hefur platan látið á sér standa.
3) Plantan heitir Chineese Democracy og kemur út í september.
4) GNR spila aldrei á Íslandi, hélt menn hefðu þetta á hreinu.