Ronaldo myndi aldrei fara

Tevez eða "CT" eins og hann er jafnan kallaður sækist væntanlega eftir stöðu Ronaldo og hvetur hann því lymskulega til að þiggja gylliboð annarra liða en Ronaldo er kænn og lætur ekki blekkjast. Hvað hefur CT fært liði sínu? Ekkert. Ef Utd. á ekki að verða næsta Newcastle verða þeir að láta að öllum óskum Ronaldo og gera honum til hæfis; þeir geta allt eins losað sig við CT sem eitrar eins og naðra innan herbúða Utd. Hann væri best geymdur í Argentínu.

Carloz Tevez: Leyfið Ronaldo að fara til Real Madrid

Hvað situr eftir?

Mér finnst það stórundarlegt að þessi hrokafulli rappari skuli raka inn seðlum af þessari gráðu. Ég fór að hugsa um hvað helst situr eftir þegar ferill hans er tekinn saman:
1. Men in black - þar sem hann lék yfir getu en sýndi þó sitt rétta andlit
2. Bad boys - líklega skemmtilegasta mynd hans en leikurinn ekki upp á marga fiska
3. Big Willie style - plata sem fylgdi eftir bylgju "nýrrar kynslóðar" í rappinu, Will Smith lofaði að halda sig frá hvíta tjaldinu en sveik það.
4. Wild Wild West - Afleit mynd og hroki leikarans yfirgengilegur.
5. I, Robot - Ágæt mynd en of langdregin, framlag leikarans þó veikasti bletturinn.

Annað tekur vart að nefna og óskiljanlegt er hversu mikið þessum         manni er hampað. Af hverju getur hann ekki verið meira eins og þessi hinn þarna svarti? Ekki Bill Cosby heldur annar yngri - man ekki nafnið.

Will Smith rakar inn seðlum

Eðlilegt og öllum hollt

Ég skil ekki fréttagildi þessa, ég hef um langt skeið haldið "bókhald" um mínar ferðir og hvet fólk til að gera slíkt hið sama. Það er ekki gert í eintómum fíflagangi heldur er þetta ein besta leið til að kortleggja líkamsstarfsemi sína og fyrstu vísbendingar um að eitthvað sé að koma einmitt fram þarna. Mér hefur ekkert gengið að koma öðrum fjölskyldumeðlinum upp á þetta en skráningin hefur komið sér vel fyrir mig og einu sinni afar vel (ég ætla að ekki að fara nánar út í það hér enda óviðkomandi). Annað sem mér finnst að mætti taka upp hér víðar en tíðskast nú þegar - það er að fyrirtæki og stofnanir taki upp svona skráningu, það er hreint óþolandi á sumum vinnustöðum hve margir taka út umframfrítíma með sífelldum klósettferðum á sömu launum og við hin. Ég lít ekki svo á að ég gangi örna minna á launum, til þess er menntun mín of verðmæt.

Skrásetja klósettferðir

Hin grýtta leið

Mikið er gaman að sjá hve Ásdísi gengur allt í haginn þessa dagana. Lífið leikur við hana. Hún rekur stórfyrirtæki sem hún stofnaði sjálf, hún er móðir, stjórnandi, eiginkona, stjarna en fyrst og fremst kona. Og við Íslendingar megum vera stoltir af þessari Frónsdóttur þótt margir viljið benda og segja: Sjá, þessi kona er ekkert nema önnur Jónína Ben. En það er bara svo ósanngjarnt. Hversu margir þekkja í raun söguna af Ásdísi? (Ég þekki hana ekki nema af afspurn) En hún hefur gengið hina grýttu leið til frægðarinnar og hefur áorkað allt upp á eigin spýtur. Fyrir utan það að verða ólétt. Nú hlakkar fjölskylda mín til að fylgjast með henni í þættinum í Ástralíu og nú er kvikmyndaheimurinn að opnast fyrir hana. Það skyldi enginn búast við of miklu fyrirfram en hver veit hvort hún verður okkar næsti Ingvar E.?

Ásdís Rán í kvikmynd

Gott að þetta var ekki í Noregi

Það fór eins og ég óttaðist, elgir virðast við fyrstu sýn vera litlar krúttlegar verur en eins og ég benti á fyrr í dag geta þeir verið varasamir. Ég er fegin því að Geir lenti ekki í elgnum á ferðum sínum um Noreg en ef það gerðist væri það hneisa fyrir Ísland út á við. Best væri að hann færi að koma heim sem fyrst því það er margt að varast á ferðum erlendis.

Drukkinn elgur réðist á stúlku

Það sem koma skal

Það er ljóst að lið Chelsea er tilbúið í slaginn og þetta sýnir það sem koma skal. Undir stjórn Felipe "Hackman" Scolari mun liðið vera ósigrandi að kalla í vetur og gera tilkall til titilsins í vor. Það er ekki séns að Arsenal komi tilbaka eftir klúðrið í sölu nú í vor; það er helst að Liverpool geti strítt þeim.

Stórsigur í fyrsta leik Scolari

Svona fer

Það er mátulegt að fólk læri að það á að koma vel fram við dýrin. Nautaat er siðlaus skemmtun líkt og hanaat og hundabardagar og þetta sýnir að þeim hefnist sem gaman hafa af því að fara illa með dýr. Ég er fegin því að svona lagað er ekki stundað hér á landi og óska þess að þetta verði til þess að nautaat verði bannað í framtíðinni. Þetta á ekki heima í siðmenntuðu samfélagi.

Nautaatshringur hrundi

Það þarf ekki svo marga

Þetta eru bæði góðar og vondar fréttir. Þær góðu eru þær að tekið er tillit til lundastofnsins á Þjóðhátíð og allir eru fullsæmdir af hvers kyns svartfugli í stað lundans. Það má matreiða hann í pottrétt og þá er enginn munur. Hins vegar verður ákveðinn fals-stimpill yfir öllu saman. Lundinn á undir högg að sækja, sérstaklega í Vestmannaeyjum og gæti senn orðið aldauða. Því ættu Peyjarnir að hugsa aðeins um náttúruna einu sinni en ekki vaða áfram í blindni. Minnumst þess að Vestmannaeyingar drápu síðasta Geirfuglinn. Ég vona að Þjóðhátíð fari vel fram að þessu sinni, það væri velkomin nýbreytni.

Ekki nægur lundi fyrir þjóðhátíð

Gaman að heyra - Varst þó elginn

Það er gaman að heyra af forsætisráðherra á léttum nótum eftir gráa mynd af Geir í fjölmiðlum undanfarið misseri. Mér stendur uggur af þessum elg og er ekki alveg rótt að vita af forsætisráðherra í elgaskógi. En ég vonast til þess að mbl og fjölmiðlar leggi meira í fréttir af þessu tagi. Lesendur fá að kynnast mannlegri hlið forsætisráðherra og öðlast samkennd með honum. Gaman væri að kynnast fleiri ráðherrum á sama hátt. Ég óska hjónunum ánægjulegs frítíma og bið þau að fara að öllu með gát! 

Geir heimsækir vini í Noregi

Synd

Það er myrkur yfir Akranesbæ þessa dagana. Fyrst tapið, þá Guðjón, svo tvíburarnir og loks þetta. Það er ekki vongóður minkur sem fer á völlinn um helgina en þegar neyðin er stærst er hjálpin næst. Þegar menn hafa náð botninum og orðið sér til skammar, gert endanlega á sig, er ekki hægt að komast neðar svo eina leiðin þaðan er upp. Atli hefur ekki spilað sem skildi í sumar, hann fékk fá tækifæri og fá lið hafa áhuga á honum en gaman verður að sjá hvert hann fer. Ég trúi því ekki að hann leggi skóna á hilluna eins og rætt hefur verið. Helst vildi ég sjá hann í Val eða í einhverju af skosku liðunum. Hann gæti einnig snúið sér að þjálfun en það er mun ólíklegra.

Sonur Guðjóns hættur með ÍA