Sniðgöngum heldur fatlaða

Mér finnst að listamenn ættu nú að sýna samstöðu og sniðganga fatlaða sem greinilega hafa horn í síðu Stiller, sem veit bara ekki betur. Síðan hvenær er ósmekklegt að gera grín að fötluðum, sér í lagi andlega fötluðum? Hver man ekki eftir myndum eins og One flew over the coocoo's nest, Girl interrupted og Something about Mary? Aldrei sniðgekk fólk þessi stykki og nú eru fatlaðir farnir að færa sig heldur betur upp á skaftið. Ég ætla að fara á þessa mynd í bíó þótt ég kjósi jafnan heldur sjónvarpið, bara vegna Ben Stiller.

Fatlaðir sniðganga Ben Stiller

N1 á hringinn og leggur hann niður

Tilgangslausustu vegaframkvæmdir Íslandssögunnar má nú líta í Hrútafirði og þetta eru afleiðingarnar. Tveimur merkum áningarstöðum ferðamanna gegnum tíðina er lokað og í staðinn kemur ein steingeld N1-sjoppa, eftirmynd þeirra í Reykjavík og á engan hátt með nokkrun karakter eins og þær gömlu góðu. Það er vonandi að Hermann Guðmundsson geti hlegið með Borðeyringunum 20 að þessu gríni sem Vegagerðin lætur hafa sig út í; ég sem skattgreiðandi geri það ekki.

Búið að loka Brúarskála

Óforskammað

Fyrir mér er brúðkaupið og dagurinn sem valinn er eitthvað sem ákveðið er með miklum fyrirvara, öllu er til tjaldað og vinum og vandamönnum er boðið til að samfagna. Að gera þetta svona upp úr þurru finnst mér óforskammað og særandi þeim sem leggja þrotlausa vinnu í undirbúning. Skyldi þetta verða til heilla, ég bara spyr! Mitt brúðkaup var ákveðið fast að ári áður og mánuðirnir fram að því voru notaðir vel, það er hjónaband sem hefur enst og ekki einhver skrípaleikur.

Skyndigifting í lopapeysu og í gúmmískóm

Kallaði hann apamann

Það er eitt að varpa ábyrgð þess að Bandaríkin séu niðurlægð á Obama sem er helsta von þeirra eins og stendur en annað og alvarlegra að kalla hann apamann (http://nymag.com/daily/intel/2008/06/the_makers_of_a_racist_obama_t.html) sem er greinileg tilvísun til kynþáttar hans og rakið kynþáttahatur. Obama er fullfær í slaginn gegn McCain og uppruni hans, sem hann getur ekkert að gert, hefur síst þar nokkuð um að segja. Í Audacity of Hope kemur skýrt fram að leið Obama í málefnum Austurlanda er skynsamleg og rökrétt og væri gaman að sjá McCain svara stefnu hans á málefnalegri hátt en þetta.

McCain hæðist að Obama

Ekki það síðasta

Það var sorglegt að fylgjast með þessum leik á netinu, bæði vegna þess að útsendingin var ómöguleg en einnig og sérlega vegna þess hvernig unnið var úr því sem átti að vera gefinn sigur. Ég er óskaplega hrædd um (því ég á frænku í liðinu) að ósigrarnir verði fleiri og liðið verði sér jafnvel til skammar í Makedóníu. Mér sárnaði að sjá leikið á 7-8 leikmönnum nánast allan fyrri hálfleikinn og skiptingar voru varla til að ræða í þeim seinni. Því miður munum við sjá fleiri fréttir líkar þessari.

Fyrsta tapið í Makedóníu

Fordómar og virðingarleysi

Hefði þessi farandlistamaður verið handtekinn ef hann hefði verið Keflvíkingur, Akurnesingur eða Fellabúi? Stungið í kaldan og óþægilegan klefa á Ísafirði "í geymslu" meðan unnið væri í hans málum. Varla. Ég sé ekki að listmálarar hafi þurft sérstakt leyfi til að selja verk sín hingað til, ekki hef ég slíkt leyfi en hef þó selt föndur. Skyldi ég þá verða handtekin fyrir þessa færslu? Þetta sýnir í hnotskurn virðingarleysi þjóðarinnar gagnvart útlendingum og þeim sem minna mega sín, fordóma yfirvalda og e.t.v. hræðslu við hið óþekkta. Ekki var þessi "útlendingur" að selja eiturlyf en það fá menn að gera óáreittir mánuðum og jafnvel árum saman. Það er sömm að þessu!

Farandsali handtekinn á Ísafirði

Allt gert í tölvu

Þetta er allt gert í tölvu eins og sjá má ef þessi mynd er stækkuð upp og upplausnin aukin. Það eru ekki nema 1:1.000.000 líkindi til þess að tvíeggja tvíburar verði annað hvort með sinn hvorn hörundslitinn eða þá skjóttir sem kallað er þegar svartir og hvítir rugla saman reitum. Þetta segja læknavísindin. En auðvitað væri þetta óskastaðan. Nú þyrftu ættingjar ekki að velkjast í vafa um hvort þeir séu með Udo eða Bamboo í höndunum þegar þeir kæmu í heimsókn. En ekki er hægt að gefa sér að lesendur séu alveg blautir á bak við eyrun.

Mislitir tvíburar

Hvenær læra erlendir ferðamenn að keyra?

Ég er búin að fá mig fullsadda af hörmungarfregnum af ökulagi erlendra ferðamanna hér á landi. Ég er með í maganum í hvert sinn sem ég fer út af þjóðvegi 1 og hef dregið nokkuð úr ferðum mínum um landið af þessum sökum. Hver er ábyrgð bílaleiga í þessu sambandi? Það get ég sagt ykkur: Hún er engin! Hvað útlenskutalandi apaköttur sem er getur leigt jeppa og skundað út á veginn án þess að framvísa svo mikið sem geðheilbrigðisvottorði. Nú tel ég tímabært að Kristján L. Möller segi af sér og Sturla taki málin aftur föstum tökum!

Erlendir ferðamenn veltu bíl á Bláfellshálsi

Verst fyrir drengina

Það er vitað mál að drengir þurfa á móður sinni að halda og Britney á kost á því að veita þeim allt sem hugurinn girnist. Það þarf ekkert að ræða það hve illa hefur verið farið með hana í þessu máli öllu og fjölmiðlar hafa ekki síst litað hana dökkum litum. Federline hefur ekkert með þessa drengi að gera enda orðinn gamall, farið að slá í hann eins og sagt er eins og sjá má á meðfylgjandi mynd. Það er grátlegt til þess að vita að þetta bíði drengjanna frekar en fallegt heimili Britney sem allt vill gera fyrir drengina eins og fram hefur komið í nokkrum tónlistartímaritum og á vefsíðum. Nú finnst mér að aðdáendaklúbburinn hér heima mætti láta í sér heyra.

Britney afsalar sér forræði

Hlær, því hann veit ekki verðið á Lýsi

Bölvuð endimis vitleysa er þetta. Lýsið er hálfu dýrara en dísillinn og þar að auki ætlað til manneldis en ekki í fíflagang. Allt gera menn nú til að komast í blöðin. Tel ég víst að við sjáum Óðin næst í Kastljósinu fyrir þetta tiltæki. Hann hlær þó ekki þegar hann kemst að raunkostnaði Lýsisins. Honum væri nær að gefa þetta í Barnahjálpina, milli 5- og 600 börn í Reykjavík meira að segja búa við skort og fá eflaust ekkert lýsi nokkurn tímann. Þá er gott að við eigum svona karla sem sóa því hlæjandi.

Drýgir dísilolíuna með hákarlalýsi